يا خسارة ...

يا خسارة...

يا خسارة أنكرت العِشرة
و بعدت عليا و نسيت
دمّرت حب من غير ما تدرى
على حظي قداش بكيت
تمنيتك تمسح لي دموعي
و تكون مائي و عطشي و جوعي
و ما تفكر لحظة في خضوعي
عن حبك يوم ما تخلّيت

الأيام نسّاتك في أحبابك
نسّاتك في اللي يحبّوك
قسّات قلبك على صحابك
جريت وراء اللي غدروك
تمنيتك تكون معاية
و تكون طبيبي و دواية
و نعلّيك قمرة في سماية
النجوم معاك يصونوك

نوّارة في جنينة عمري
و الناس من حبّنا تتعلّم
البسمة اللي تنوّر دربي
تفهمني قبل ما نتكلّم
تمنيتك تفهملي عيوني
و تبدّد شكّي و ظنوني
و تنوّر عقلي و جنوني
في حياتي و روحي تتحكّم

ما ندمت في حبّك ما عييت
و الناس ديما عليّا تلوم
لا كلّيت و لا ملّيت
قالوا لي عليك مجنون
قالوا لي في سكّته عذاب
ياسر نصحوني الكتّاب
طريقه جمر مش تراب
حتى جاني هذا اليوم

سهى التونسية

كلمات بالعاميّة التونسية أتمنى أن تكون مفهومة
و اللي مش فاهم كلمة أنا هنا للتفسير....
قاموس تونسي -عربي

الغالية سهى
كأنها كلمات بالدرجة العامية المغربية
تحياتي ومودتي

تسلمي سهى على كلماتك الجميلة والرائعة
وفقك الله ولك مني كل الاحترام والتقدير.

أمونة سعاد كتب:: الغالية سهى
كأنها كلمات بالدرجة العامية المغربية
تحياتي ومودتي

أختي العزيزة أمونة سعاد
إنها بالدارجة العامية التونسية
و بحكم أننا ننتمى للمغرب العربي الحبيب
فلهجاتنا تتقارب كثيرا
كلنا واحد حبيبتي ، لا تفرق بيننا جنسيات
شكرا على مرورك الجميل
تحياتي و محبتي

محمد السواعي كتب:: تسلمي سهى على كلماتك الجميلة والرائعة
وفقك الله ولك مني كل الاحترام والتقدير.

شكرا محمد السواعي
بالتوفيق للجميع في قطر الإمتياز الدائم
أسعدني مرورك النديّ على صفحتي البسيطة
تقبل مني فائق احتراماتي